Limbara Nord da chinci a 30 anni. La Convenzione trentennale Comune-AFDSR (oggi Agenzia Forestas)

Chisti pagini (palti in bassu) vinisini scritti a la fini di l’anni ’90 e, forsi, pudiani andà be’ puru pa’ l’anni ’70 e ‘80. No pensu sariani stati abbeddu diffarenti scritti una ‘intina d’anni primma. Forsi si sariani puduti scrì meddu e tuccà la chistioni Demaniu comu si cunvinia, ma no è chistu lu puntu abali. Oggji pari chi da chistu documentu sia passatu un seculu e più.

Illu 1997 v’era ancora la Comunitai Montana, no v’erani l’Unioni di li Cumuni e, più e più, chissa chi abà cjamemu Agenzia Forestas aia passoni trabaddendi in Limbara a cincu/sei ʼolti tantu di li chi vi so oggji. A li tempi si faiddaa pocu e nudda di sustinibbilitai e ambienti, oggji chisti algumenti so in bucca a tutti. Calchʼe volta cun pruvettu calchʼe volta tantu paʼ dì, ma in una manera o ill’alta so l’algumenti di lu tempu nostru.

Li SIC e li ZPS erani gja priiduti da l’ex Comunitai Europea ma chinci no viniani mintuati e di mancu ancora s’era pinsatu e iscrittu un Pruggjettu pa’ lu SIC. Chistu vali, a dolu mannu, puru abali, vistu chi guasi 15 milia ettari di lu SIC Monti Limbara (a Tempiu s’aggjungjini Caragnani, Oscari, Bilchidda) no ani ancora un Pruggjettu. Dunca la dummanda è: cal è lu tempu ‘inidori pa’ Limbara? Cos’è più o mancu impultanti e comu ‘idimu Limbara da chinci a 30 anni? Innant’a cosa si doaria rasgiunà primma di tuttu, cun cali e comu faiddanni? L’alti Comuni? RAS? Forestas? Unioni di li Cumuni? Tutti insembi?

Ill’ultimi 2-3 elezioni cumunali di Tempiu – pa’ no faiddà di chissi regionali – m’è parutu chi calchedunu, a fultu, aissia impacchittatu e cuatu lu sigundu Monti di la Saldigna. No si ni faiddaa e puru oggji guasi tutti si galdani be’ da piddà lu cuntrastu o, paʼ lu mancu, piddallu in manera cumprita. No po esse tuttu marketing, palchì Limbara è sempri chinci e calchʼe cosa bisognaria finza che falla, cumincià a punì afficcu, cumincià a dì cosa si ‘olaria di precisu e no li fesserii chi ispissu aemu intesu in fra di l’anni.

A palti la ’algogna di l’Hotel Limbara in Curadureddu, chi n’aggju gja scrittu, si podaria mintuà calchʼe alta chistioni. Lu SIC Monte Limbara un PG lu ‘idarà mai? L’antincendio Madonnina-Vallicciola l’aremu a cumprì o chissi 150.000 euro gja spesi so gjittati in tuttu? L’Agenzia Forestas ponarà gjenti noa a trabaddà o cjudaremu alti Cantieri Forestali comu suzzessu pa’ dinni unu a chissu di Caragnani calchʼe annu fa? Lu depuradori in Vallicciola? E comu si ‘olariani curà li lachi minureddi spalti in tuttu Limbara? Aremu a pinsà a un pruggjettu pa’alliciricà l’effetti di l’antenni (centro trasmittente RAI) chi be’ be’ a la saluti propiu no facini? E chissu muntinaggju militari di l’ex USAF? Bunificà fend’avveru, pal piaceri lassemu paldì li “centri astronomici” pa’ figgjulà li neuli di padda, li “laboratori” di la ciavana o li foli undi arrea un priatu e ci faci tuttu lu trabaddu dibbata. Saria ora d’agabballa cuʼ l’isciuti mezu naif. Comu aggju scrittu alti ‘olti, n’anda bucatu chissu muntinaggju, vi ʼolarani un beddu pocu di dinà; pulitu lu locu, pudé torra trattà l’ea di la Madonnina pa’ antincendio e no solu, comu cunsiddesini puru li Vigili del Fuoco in una relazioni una chindicina d’anni fa (liggjitivilla). Inveci ancora semu cussì. Inveci di pinsà a trattà l’ea, bucanni metri cubi di canaletti in cimentu-amianto e l’acidu di li celli elettrolitichi semu faiddendi di figgjulacci lu celi la notti di Santu Larenzu. Chi biddesa.

Faiddà di “centralità” à sempri chistu piriculu, chiddu d’esse solu una mascara pa’ carraggjà un muntoni di padda. È puru in chisti cosi chi si ʼidi l’impultanzia e l’arriamentu di una Citai, vistu chi pa’ scrì un Pruggjettu pa’ lu SIC o cunculdià lu sviluppu di 30 milia ettari di Limbara v’è bisognu primma di tuttu di sapé di cosa semu faiddendi e no impruisà slogan. Rasgiunanni puru cuʼ l’alti Cumuni, a paru, no solu faiddassi innantu dicendisi cantu semu beddi, cantu semu manni, cantu semu Tempiu. La centralitai è comu l’umiltai: si ti la dai da pal te, vo dì chi no n’ai.

Pa’ turrà a la fotografia, chista è la Convenzione di Tempiu cuʼ l’ex-AFDSR innant’ a lu Demaniu di Tempiu ill’ala nord di Limbara. La filmesini l’assessori regionali a l’ambienti di tandu, Pasquale Onida di Sedilo, e l’ex sindacu di Tempiu, Antonio Dibeltulo. Tantu pa’ sapella, chistu documentu scadi l’annu chi veni. Trent’anni dapoi, sigundu ‘oi comu doaria esse scrittu? Di cosa doaria faiddà pa’ trabaddà innant’a Limbara cun pruvettu da oggji pa’ alt’e 30 anni?

Pinseti di punivvi manu o sigundu ‘oi s’arà a scrì dapareddu?